Geloof vir Tye wat Kom
Ek kan nog onthou hoe diep ek geraak was deur 'n lied wat 'n paar jaar gelede verskyn het. Dit word genoem "Clear the Stage" deur die musikant Jimmy Needham.
Die lied praat van hoe 'n groot aantal kerke – insluitend die laaste een wat ek gelei het – 'n groot indruk kan maak met rookmasjiene, reusagtige videoskerms en ‘n massiewe aantal ligte. Die boodskap van Jimmy was hoe maklik ons afhanklik raak van uiterlike tierlantyntjies soos hierdie en dan Jesus uiteindelik mis.
Ek gebruik dikwels in my preke en boodskappe die Hebreeuse term kavod. Dit verwys na die "gewigtigheid" van God se heilige teenwoordigheid en hoe die effek daarvan ons tot ontsag en eerbied dryf. Vir my is dit wat die lied "Clear the Stage" beteken. Dit openbaar hoe doelgerig ons moet wees – metafories, simbolies en soms letterlik – om die kavod van Jesus te nader en sy sentraliteit in ons lewens te behou.
Die pandemie het party kerke gedwing om dit wat die lied voorstel te doen. Verhoë is skoongemaak, aangesien baie gemeentes opgehou het om dienste te hou uit oorweging vir die veiligheid van mense. Talle Christene moes hul toevlug neem tot Zoom of videodienste om tye van aanbidding te hou.
Nodeloos om te sê, dit was 'n pynlike seisoen vir baie in Christus se liggaam. Terselfdertyd het dit ons herinner aan hoe belangrik ware gemeenskap en rein aanbidding is.
Namate meer mense ingeënt word en kerke hul deure weer begin oopmaak, bly daar die vraag: sal ons vergeet wat ons beleef het en aan afgodiese tierlantyntjies bly vashou? Of het hierdie ontnugterende seisoen ons honger na kavod opgewek? Was ons gedring om die gewigtigheid en teenwoordigheid te soek van God in wie ons leef en beweeg en is?
Dwarsdeur die geskiedenis van God se kinders, kon rampspoedige tye, tye van reiniging of loutering wees.
Selfs in sommige van die slegste tye het die Here manna gestuur om sy volk aan sy goedheid te herinner. Sulke tye is bedoel om ons harte te laat uitroep: “Here, al wat ek nou wil hê, is U. Ek sien duidelik al die afgode waarop ek vertrou het, die aardse dinge wat ek toegelaat het om my besig te hou. Dit alles is nou vir my betekenisloos. Neem asseblief my vleeslike behoeftes weg en rig my begeertes op u plan. Ek vra U om die verhoog van my hart skoon te maak, sodat ek 'n skoon gewete en 'n duidelike visie kan hê. Ek wil niks voor my hê nie, behalwe die gewigtigheid van u heerlikheid, Jesus.”
Smag jou hart na God se glorieryke, gewigtige teenwoordigheid terwyl beperkings ná die pandemie opgehef word? Verlang jy meer as ooit tevore om Jesus sentraal te stel in elke deel van jou lewe?
Paulus beklemtoon hierdie sentraliteit in sy brief aan die Kolossense. “…Alle dinge is deur Hom en tot Hom geskape. En Hy is voor alle dinge, en in Hom hou alle dinge stand” (Kolossense 1: 16-17, AFR53).
Nadat ek ‘n paar jaar gelede 'Clear the Stage' vir die eerste keer gehoor het, het ek 'n boodskap daaroor verkondig. 'n Jong predikant het my daarna genader en gesê: “Ek waardeer jou preek, maar ek dink dit is nie reg vir ons kerk nie. Dit is veels te ernstig en stemmig. Ek kan sien hoe dit gepas sal wees vir die konferensies van predikante van World Challenge waar jy herders opdrag gee om hul heilige roeping te vervul. Maar baie mense in die kerkbanke het aanmoediging nodig.”
Ek het hom saggies en opreg geantwoord: “Ek dink nie daar is 'n meer bemoedigende boodskap as 'Stel Jesus eerste in jou lewe. Raak ontslae van elke afgod wat jou weerhou om Hom te volg. Maak nie saak wat jy beleef nie, jy sal seën vir jouself, jou gesin en almal rondom jou ontvang.”
Jesus het gesê dat moeilike tye soos hierdie pynlike jaar waardeur ons so pas gegaan het, verwag moet word in hierdie wêreld.
In Matthéüs 24 was die dissipels ontsteld om te hoor hoe Jesus die verwoesting van Jerusalem en die tempel voorspel. Hulle het gevra wanneer hierdie ernstige rampspoedige dinge – en die “einde van die tyd” (Matthéüs 24:3) – sou plaasvind, en Jesus se antwoord was veelseggend. “Pas op dat niemand julle mislei nie” (24:4).
Ek vind Jesus se antwoord hier interessant. Toe Hy gevra is oor dinge wat sou kom, het Hy Hom op valse lering toegespits. Hierdie tema strek dwarsdeur die Nuwe Testament uit die penne van Paulus, Petrus en Judas, veral met betrekking tot die eindtyd.
“Maar daar was ook valse profete onder die volk, net soos daar onder julle valse leraars sal wees wat verderflike ketterye heimlik sal invoer, en ook die Here wat hulle gekoop het, verloën en ‘n vinnige verderf oor hulleself bring; en baie sal hulle verderflikhede navolg, en om hulle ontwil sal die weg van die waarheid gelaster word ”(2 Petrus 2:1-2).
In moeilike tye van angs en verwarring, kan ons in die versoeking kom om ons te wend na stemme of dinge wat ‘n valse gevoel van vertroosting bied. Ons moet ons voortdurend tot die Heilige Gees wend in volle vertroue dat Hy ons sal herinner aan die vaste Woord wat ons ontvang het. Op ons beurt moet ons Bybelse waarheid getrou spreek teenoor ons broers en susters wat in die versoeking kan kom om verwoestende dwaalleer na te volg.
In die moeilike tye soos hierdie wat ons verduur, glo ek die Heilige Gees vra ‘n vraag vir almal wat Jesus volg.
Die Spaanse griep het 100 jaar gelede ‘n groot deel van die wêreld se bevolking uitgewis. Nou sê wetenskaplikes dat nog virusse ná die verwoesting van COVID-19 kan voorkom. Die wêreld is reeds deur een pandemie uitgeput; hoe gaan ons ander potensiële rampe hanteer?
Ek vind ‘n gedeelte in Jeremia baie nuttig. Toe die profeet uitgeput was as gevolg van 'n wrede aanval van iemand, het God 'n vraag aan hom gestel: “As jy met voetgangers loop, maak hulle jou moeg: hoe sal jy dan wedywer met perde?” (Jeremia 12:5).
Ek wonder of die Gees vandag iets soortgelyks van Christus se volgelinge vra. “Word jy oorweldig deur die daaglikse stryd waarmee jy te doen het? Laat dit jou wanhopig en verward? Sê my, as jy oor sulke dinge ontsteld raak, hoe sal jou geloof jou deur werklike moeilike tye dra?”
Niemand kan blameer word dat hy sukkel om vrede te vind in tye van groot beproewinge nie, maar hoe kan ons vandag krag kry vir groter stryd wat nog kom? Soos Jeremia vra, hoe sal ons leer om met perde te wedywer?
Ek glo die beste manier om vir moeilike tye voor te berei, is om te vra wat dit beteken om die wapens van die geestelike oorlogvoering op te neem.
Te midde van ernstige moeilike tye, hoe moet ons op die skild van die geloof, die swaard van die Gees, die borswapen van geregtigheid, die helm van verlossing, 'n passie vir Jesus en die vuur van die Gees vertrou? Hoe gebruik ons hierdie wapenrusting, sodat ons geloof nie net staande bly in die naderende tye nie, maar ook floreer?
Paulus praat hieroor in sy tweede brief aan Timótheüs. Teen hierdie tyd was die apostel 'n ouer man, opgesluit in Rome, deur allerhande beproewings en het selfs die dood in die gesig gestaar. Hy het aan Timótheüs geskryf: “Om hierdie rede herinner ek jou daaraan om die genadegawe van God aan te wakker wat in jou is deur die oplegging van my hande. Want God het ons nie 'n gees van vreesagtigheid gegee nie, maar van krag en liefde en selfbeheersing” (2 Timótheüs 1:6-7).
Paulus maak dit duidelik dat ons niks wat kom moet vrees nie. Hy sê dat die gawe van die Heilige Gees in ons is en dat ons die vlamme van die geloof wat reeds in ons woon, moet aanblaas.
Intussen moet ons nie toegee aan vrees nie, maar op God vertrou vir al die krag, liefde en selfbeheersing wat Hy deur die Gees verskaf. “... wat ons van ewigheid af in Christus Jesus geskenk is, maar wat nou geopenbaar is deur die verskyning van ons Verlosser, Jesus Christus, wat die dood tot niet gemaak het en die lewe en die onverderflikheid aan die lig gebring het deur die evangelie” (1:9-10) .
Toe Paulus dit geskryf het, het hy geweet dat hy sou sterf. Hy was nie bang nie en hy het Timótheüs opdrag gegee om dieselfde gees te hê en het in wese gesê: “Wees nie bevrees vir enige lyding wat jy mag ondervind nie. God het jou beide gered en vir jou 'n heilige roeping gegee. Sy doel en genade word geopenbaar deur die verskyning van Jesus wat die dood afgeskaf het en ons onsterflikheid gegee het.”
Dit maak nie saak wat hier op aarde deur die Gees gebeur nie, ons kan ons gedagtes en harte vestig op die onwrikbare Christus wat ons redding in sy onwankelbare hande hou.
Ons Heiland se genade stel selfs die swakstes onder ons in staat om geloof te hê om met perde te wedywer. Vriend, ek vra jou om die vlam van die Gees in jou binneste aan te blaas, om krag, liefde en 'n gesonde verstand te kry. Dan sal jy vrede hê oor jou geliefdes en die moed hê om enigiets te enige tyd die hoof te bied om Hom grootliks te verheerlik. Amen