Hebreërs 12:1 sê vir ons dat die wêreld omring word deur ‘n wolk van getuies wat saam met Christus in die hemel is. Wat het hierdie menigte hemelse getuies vir die huidige wêreld te sê?
Ons dag is baie voorspoedig. Ons ekonomie is geseënd, maar tog het ons samelewing so onsedelik, gewelddadig en anti-God geword dat selfs sekulariste kla oor hoe ver ons gedaal het. Oral wonder Christene waarom God sy oordele oor so ‘n goddelose samelewing uitstel.
Ons wat Christus liefhet, verstaan miskien nie waarom soveel boosheid toegelaat word om te gedy nie. Maar die wolk van hemelse getuies verstaan. Hulle bevraagteken nie die genade en geduld wat God betoon nie.
Die apostel Paulus is deel van die wolk van getuies en hy getuig van God se onbeperkte liefde vir selfs “die vernaamste sondaar” (sien 1 Timótheüs 1:15). Paulus se lewe en geskrifte sê vir ons dat hy die Naam van Christus vervloek het. Hy was ‘n terroris, het God se kinders opgespoor en uitgesleep om hulle in die tronk te gooi of te laat doodmaak. Paulus sou vir ons sê dat God geduldig is met hierdie huidige geslag, want daar is baie wat soos hy was, mense wat uit onkunde sondig.
Die apostel Petrus is ook onder die wolk van getuies, en hy verstaan ook waarom God so geduldig is. Petrus se lewe en geskrifte herinner ons daaraan dat hy Jesus gevloek en gesweer het dat hy Hom nooit geken het nie. God weerhou sy oordeel omdat daar nog menigtes is wat Hom vloek en verloën, net soos Petrus gedoen het. Die Here sal nie moed verloor met hulle nie, net soos Hy ook nooit moed verloor het met Petrus nie. Daar is baie soos hy vir wie Christus nog steeds bid.
Terwyl ek oor hierdie wolk van getuies peins, sien ek die gesigte van voormalige dwelmverslaafdes en alkoholiste, voormalige prostitute en homoseksuele, voormalige gangsters en smokkelaars, voormalige moordenaars en vroueslaners, voormalige ongelowiges en pornografie verslaafdes – menigtes waarmee die samelewing moed verloor het. Hulle het almal tot bekering gekom en in die arms van Jesus gesterf, en nou is hulle getuies van die barmhartigheid en geduld van ‘n liefdevolle Vader.
Ek glo dat hulle almal in een verenigde getuienis sou sê dat Jesus hulle nie veroordeel het voordat hulle sy genade ontvang het nie. Mag Hy ons help om die verlorenes lief te hê net soos Hy. En mag ons bid om die liefde en geduld te hê wat Hy tans aan die wêreld bewys.