DAAGLIKS ONS OË OP JESUS HOU

Paulus praat van ‘n sekere bediening waarvoor elke Christen geroep is. Hierdie bediening vereis nie sekere gawes of talente nie; liewer, dit moet onderneem word deur almal wat weergebore is. Trouens, hierdie bediening is alle gelowiges se eerste roeping. Alle ander ondernemings moet daaruit voortspruit, omdat geen bediening God kan behaag nie, tensy dit uit hierdie roeping gebore word.

Ek praat van die bediening van om die aangesig van Christus te aanskou. Paulus sê, “Ons almal met onbedekte gesig soos in ‘n spieël die heerlikheid van die Here aanskou” (2 Korinthiërs 3:18). Wat beteken dit om die Here se heerlikheid te aanskou? Paulus praat hier van toegewyde, gefokusde aanbidding – tyd wat aan God gegee word, bloot om Hom te aanskou. En dan voeg die apostel vinnig by, “Daarom, aangesien ons hierdie bediening het” (4:1). Paulus maak dit duidelik dat om die aangesig van Jesus te aanskou, ‘n bediening is waaraan ons almal onsself moet toewy.

Die Griekse woord vir “aanskou” in hierdie vers is ‘n baie sterk uitdrukking; dit dui nie net op ‘n kykie nie, maar “die oë daarop rig.” Dit beteken, “Voor ek enigiets anders doen of probeer om ‘n enkele ding te bereik, moet ek in God se teenwoordigheid wees.”

Baie Christene wanvertolk die frase “aanskou soos in ‘n spieël” (2 Korinthiërs 3:18). Hulle dink aan ‘n spieël met Jesus se gesig wat na hulle weerkaats. Maar Paulus praat van ‘n intense gefokusde blik, asof jy ernstig na iets deur die glas tuur om dit duideliker te kan sien. Ons moet ons “oë rig” op hierdie manier, vasbeslote om God se heerlikheid in die aangesig van Jesus te aanskou. Ons moet onsself afsonder met Hom en met soveel toewyding gemeenskap hou dat ons verander word.

Paulus gaan verder in 2 Korinthiërs 3:18, “En terwyl ons almal met onbedekte gesig soos in ‘n spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is.” Deur in die teenwoordigheid van Christus te wees, word ons verander deur die werk van die Gees. Hoe wonderlik om te weet dat die Heilige Gees ‘n progressiewe toename van die karakter van Christus in ons werk terwyl ons op Hom fokus.