Deernis vir Hulle wat Ly
Die evangeliste George Whitefield en John Wesley was twee van die grootste predikers in die geskiedenis. Hierdie manne het vir duisende in openbare byeenkomste, op straat, in parke en tronke gepreek, en deur hulle bedieninge is baie mense na Christus gebring. Maar ‘n leerstellige geskil het ontstaan tussen die twee mans oor hoe iemand geheilig word. Beide leerkampe het hul posisies sterk verdedig, en ‘n paar kwaadwillige woorde is uitgeruil, terwyl die aanhangers van albei mans op ‘n skynbaar onbetaamlike manier gestry het.
‘n Volgeling van Whitefield het eendag na hom toe gekom en gevra: “Sal ons John Wesley in die hemel sien?" Hy het eintlik gevra: “Hoe kan Wesley gered word as hy so ‘n dwaalleer verkondig?”
Whitefield het geantwoord: “Nee, ons sal John Wesley nie in die hemel sien nie. Hy sal so hoog op naby Christus se troon wees, so naby aan die Here dat ons hom nie sal kan sien nie.”
Paulus noem hierdie soort gees “verruim in die hart.” En hy het dit self gehad toe hy geskryf het aan die Korinthiërs, ‘n kerk waar sommige hom van hardheid beskuldig het en wat sy prediking geminag het. Paulus het hulle verseker: “Ons mond het tot julle oopgegaan, Korinthiërs, ons hart het verruim geword” (2 Korinthiërs 6:11).
As God jou hart verruim, word daar skielik soveel grense en hindernisse verwyder! Jy sien nie meer deur ‘n smal lens nie. In plaas daarvan, kom jy agter dat jy deur die Heilige Gees gerig is op diegene wat ly. En hulle wat ly word aangetrek deur jou deernisvolle gees deur die magnetiese aantrekkingskrag van die Heilige Gees.
Het jy ‘n sagmoedige hart as jy mense sien ly? As jy ‘n broer of suster sien wat in sonde verval het, of moontlik probleme ondervind, word jy versoek om hulle te vertel wat verkeerd is met hulle lewens? Paulus sê dat hulle wat ly, herstel moet word in ‘n gees van nederigheid en sagmoedigheid. Hulle moet die gees wat Jesus uitgestraal het, demonstreer. Mag die uitroep van ons harte wees: “God, neem alle engheid uit my hart weg. Ek wil u gees van medelye hê met diegene wat ly ... u gees van vergifnis as ek iemand sien wat afvallig is ... u gees van herstel om hul skande weg te neem. Haal alle eksklusiwiteit uit my hart uit en verruim my vermoë om my vyande lief te hê.”