Die Hoëpriester van Vrede
Jesus het aan die kruis gesterf om vrede met God vir my te koop, en Hy is nou in die hemel om daardie vrede vir my en in my te handhaaf. Die vrede wat ons deur Christus met God het, onderskei ons geloof van alle ander godsdienste.
In elke ander godsdiens behalwe die Christendom, word die sondevraagstuk nooit afgehandel nie. Sonde se heerskappy is eenvoudig nie gebreek nie. Daarom, "Geen vrede, sê die HERE, vir die goddeloses nie" (Jesaja 48:22, AFR53), maar ons het 'n God wat vrede verskaf deur sonde te vergewe. Dit is juis die rede waarom Jesus aarde toe gekom het: om vrede te bring aan die ontstelde, vreesbevange mensdom. Hoe handhaaf Jesus God se vrede vir my? Hy doen dit op drie maniere.
Eerstens het Christus se bloed die skuld van my sonde weggeneem. In hierdie sin sê Paulus: “Want Hy is ons vrede” (Efésiërs 2:14). Jesus het vrede vir my gemaak deur sy bloed.
Tweedens, Christus handhaaf my vrede en vreugde in geloof. “En mag die God van die hoop julle vervul met alle blydskap en vrede deur die geloof, dat julle oorvloedig kan wees in die hoop deur die krag van die Heilige Gees” (Romeine 15:13).
Derdens, Jesus laat my bly wees oor die hoop om die heerlikheid in te gaan. “Ons roem in die hoop op die heerlikheid van God” (Romeine 5:2).
Eenvoudig gestel, vrede is die afwesigheid van vrees, so 'n lewe sonder vrees is 'n lewe vol vrede. Toe Jesus na die hemel opgevaar het, het Hy Hom nie net verlustig in die heerlikheid wat God aan hom geskenk het nie. Nee, Hy het na die Vader gegaan om die swaar verworwe vrede wat Hy vir ons op Golgota verwerf het te handhaaf.
Ons Verlosser leef tans in heerlikheid en Hy is beide volkome God en volkome mens met hande, voete, oë en hare. Hy het ook die spykerletsels aan sy hande en voete, asook die wond in sy sy. Hy het nooit sy menslikheid verwerp nie; Hy is steeds 'n mens in heerlikheid. Op die oomblik is ons Mens in die ewigheid besig om seker te maak ons word nooit beroof van die vrede wat Hy ons gegee het toe Hy weg is nie. Hy dien as ons Hoëpriester en is aktief betrokke om sy liggaam op aarde vol van sy vrede te hou. En wanneer Hy weer kom, wil Hy hê dat ons “voor Hom bevind mag word in vrede” (2 Petrus 3:14).
