Die Vrede van God in Jou
'n Christenvrou het my onlangs met 'n taamlik emosionele uitdrukking genader en my gevra of ek die jongste nuusberig oor die omwenteling in Pakistan gehoor het. “Kan jy glo wat aan die gebeur is?” sy het gevra. “Elke dag is 'n slegte nuusdag. Pakistan het kernkragkapasiteit. Terroriste kan oorneem en een of ander mal Ajatolla kan ons in kernoorlog dompel.” Sy het haar kop geskud en gesê: “Ek is regtig bang. Dinge raak buite beheer.”
Op die oomblik is mense oor die hele wêreld bang. Ons sien die vervulling van Jesus se waarskuwing, dat 'n dag sou kom wanneer mense se harte beswyk van vrees terwyl hulle die dinge sien wat op die aarde gebeur.
Laat ek nou vir jou 'n duidelike boodskap uit God se hart gee, 'n woord van bemoediging. Ten spyte van al die skrikwekkende nuus, het God steeds alles onder beheer.
Hier is die Woord waarop ons gelowiges moet staan terwyl die storm om ons woed, woorde wat Jesus aan ons gegee het. “Vrede laat Ek vir julle na, my vrede gee Ek aan julle; nie soos die wêreld gee, gee Ek aan julle nie. Laat julle hart nie ontsteld word en bang wees nie” (Johannes 14:27, AFR53). Dit is moeilike tye, maar in sulke tye word die Woord van God ons krag en hoop.
“So is die HERE dank ‘n rotsvesting vir die verdrukte, ‘n rotsvesting in tye van benoudheid. En hulle wat u Naam ken, sal op U vertrou, omdat U die wat U soek, nie verlaat nie, o HERE!” (Psalm 9:10-11).
“Want Hy steek my weg in sy hut in die dag van onheil; Hy verberg my in die skuilplek van sy tent; Hy verhef my op ‘n rots” (Psalm 27:5).
Ek glo die mees vreesaanjaende, kommerwekkende dae lê nog voor. Ek sien niks anders as groeiende wanhoop vir diegene wat nie daagliks tyd in God se Woord deurbring en bid en met die Here praat nie. Dit is sy Woord wat ons gees ophef en geloof voortbring. Dissiplineer jouself nou om jou Bybel soggens oop te maak en jou dag te begin deur bemoedig te word met sy kosbare beloftes. Praat met die Here, selfs terwyl jy voorberei vir die dag. Vra die Heilige Gees om jou geloof en hoop te versterk.