Gee God Alles Wat Ons Het
“En daarom sal die Here met ongeduld daarop wag om julle genadig te wees, en daarom sal Hy Hom verhef om Hom oor julle te ontferm; want die Here is 'n God van die gerig. Welgeluksalig almal wat op Hom wag! Want ‘n volk sal op Sion, in Jerusalem, woon; jy sal nie meer ween nie; sekerlik sal Hy jou genade bewys op jou hulpgeroep; sodra Hy hoor, antwoord Hy jou” (Jesaja 30: 18–19, AFR53). Jesaja het gesê: “As jy net op die Here wag, as jy weer tot Hom uitroep en terugkeer daarna om Hom te vertrou – sal Hy alles vir jou doen wat ek gesê het en meer.”
God kan net 'n woord spreek en die vyand sal voor ons wankel. “Want vir die stem van die HERE sal Assur verskrik wees; met die stok sal Hy slaan” (Jesaja 30:31). Geliefdes, daar is geen saak wat ons Vader nie kan oplos nie, geen stryd wat Hy nie vir ons kan wen met slegs 'n woord uit sy lippe nie. Jesaja sê "die asem van die Here" sal alles op ons pad verteer (sien Jesaja 30:33).
Ten spyte hiervan, is die proses om God in alles te vertrou nie maklik nie. Ek het die Here gesoek oor 'n situasie rakende ons kerkgebou hier in New York. Ek het vir God gesê: “Ek vertrou U hiervoor, Vader. Ek het U daaroor gesoek en ek sal vrede daaroor hê.” Hier is hoe Hy my geantwoord het. “David, Ek is verbaas dat jy My kan vertrou met jou vaste eiendom, finansies en ander materiële dinge, maar jy sal My steeds nie vertrou met jou fisiese welstand nie.”
Ek was baie bewus van my ouderdom. Ek was baie bekommerd oor wat met my gesin sou gebeur na my dood. Nou het die veroordelende woorde van die Here my soos 'n donderslag getref. Ek het elke materiële kwessie in sy hande oorgegee, maar nie die ewige bekommernisse nie. Ek het besef: "Here, U wil hê ek moet U met alles vertrou, nie waar nie?"
Ja, dierbare heilige, Hy wil alles hê, jou gesondheid, jou gesin, jou toekoms. Hy wil hê dat jy alle sake aan Hom toevertrou. Hy wil hê dat jy in stilte, vertroue en rus moet lewe.
Gaan na jou afgesonderde binnekamer en wees alleen saam met die Here. Bring alles na Hom toe. Hy het belowe: “Jy sal my woord agter jou hoor en jou sê watter kant toe om te gaan. Dit is die pad. Loop nou daarop.”
Die bewys van geloof is rus. Vertroue lei tot gemoedsrus. Ware geloof vertrou alles toe aan sy hande.
