Een van die belangrikste verse in die hele Skrif word gevind in Petrus se eerste sendbrief waar die apostel praat van die noodsaaklikheid om ons geloof te laat toets. “Sodat die beproefdheid van julle geloof, wat baie kosbaarder is as goud wat vergaan maar deur vuur gelouter word, bevind mag word tot lof en eer en heerlikheid by die openbaring van Jesus Christus” (1 Petrus 1:7, AFR53).
Die Griekse woord wat hier vir beproewinge gebruik word, beteken “ondersoek of toets met probleme en teëspoed”. Hierdie gedeelte suggereer dat God sê: “Jou geloof is vir my kosbaar, kosbaarder as al die rykdom van hierdie wêreld wat eendag sal vergaan. In hierdie laaste dae, wanneer die vyand allerhande onheil teen jou stuur, wil ek hê dat jy sterk moet kan staan met 'n onwrikbare geloof.”
Petrus sê: “Die Here weet om die godsaliges uit versoeking te verlos en die onregverdiges te bewaar vir die dag van oordeel om gestraf te word” (2 Petrus 2:9). Die Griekse woord wat hier vir versoeking gebruik word, beteken “om teëspoed op die proef te stel.” Dit is duidelik dat God ons nie in ons beproewinge wil hou nie. Waarom sou Hy daarin belangstel om ons in versoeking en beproewing te hou? Hy kry geen eer daaruit om sy kinders te beproef nie, maar uit die resultate van ons beproewings!
Daar is net een manier om van ons beproewinge af weg te kom, en dit is deur die toets te slaag. Dink daaroor na. Toe jy op skool was, hoe het jy uiteindelik weggekom? Jy het die eindeksamen geslaag. As jy nie geslaag het nie, is jy teruggestuur klas toe.
Dit was die geval met antieke Israel. Toe God hulle na die Rooisee geneem het, was Hy besig om sy volk te bepoef, hulle te louter, hulle op die proef te stel. Hy het hulle tot op die rand van vernietiging gebring, hulle omring met berge aan twee kante, 'n see aan die ander kant en 'n naderende vyand aan die ander kant.
Tog het die Here Israel in daardie omstandighede geplaas terwyl Hy 'n sekere reaksie verwag het. Hy wou hê dat sy volk hul hulpeloosheid moes erken. Hy wou hulle hoor sê: “Ons onthou hoe God ons van die plae verlos het. Ons onthou hoe Hy ons uit die smeltkroes van ellende gehaal het waar ons stene sonder strooi gemaak het en geen rus gehad het nie. God het ons tóé verlos, en Hy sal dit weer doen! Laat ons onself verbly in sy getrouheid. Hy is God, en Hy het ons beloftes gegee wat Hy sal nakom. Hy sal ons beskerm teen elke vyand wat ons wil aanval.” Sulke geloof is vir God 'n lieflike geur.