Laat God Ons Harte Deursoek
Weet jy dit is moontlik om met 'n volmaakte hart voor die Here te lewe?
Om die idee van volmaaktheid te verstaan, moet ons eers verstaan dat volmaaktheid nie 'n sondelose, foutlose bestaan beteken nie. Nee, volmaaktheid beteken in die Here se oë iets heeltemal anders. Dit beteken volkomenheid, volwassenheid.
As jy smag na Jesus, probeer jy dalk reeds om hierdie opdrag van die Here te gehoorsaam. Dit is moontlik, anders sou God nie vir ons so 'n oproep gegee het nie. Om 'n volmaakte hart te hê, was deel van die geloofslewe vandat God die eerste keer met Abraham gepraat het. “Ek is God, die Almagtige; wandel voor my aangesig, dan sal ju opreg wees” (Génesis 17:1, AFR53).
Die Hebreeuse en Griekse betekenisse van volmaaktheid sluit in “opregtheid, sonder vlek of gebrek, om volkome gehoorsaam te wees”. Dit beteken om klaar te maak wat begin is, om volledig uitvoering te gee. John Wesley het hierdie konsep van volmaaktheid "konstante gehoorsaamheid" genoem. 'n Volmaakte hart is 'n hart wat reageer, een wat vinnig en volkome antwoord op die Here se hele oproep. Die volmaakte hart roep saam met Dawid: “Deurgrond my, o God, en ken my hart; toets my en ken my gedagtes; en kyk of daar by my 'n weg is van smart, en lei my op die ewige weg!” (Psalm 139:23–24).
God deursoek inderdaad ons harte; Hy het in wese vir Jeremia gesê. “Ek, die HERE, deursoek die hart, toets die niere, om aan elkeen te gee na sy weë, volgens die vrug van sy handelinge” (Jeremia 17:10).
Diegene wat 'n boesemsonde wegsteek, wil egter nie deursoek of skuldig bevind word nie. Die volmaakte hart smag na meer as sekuriteit of om sy sonde te bedek. Die volmaakte hart wil hê dat die Heilige Gees die innerlike mens moet kom deursoek. 'n Ware kind van God wil hê dat Hy op hulle lewe moet skyn en alles uithaal wat anders is as Christus. Hulle poog om altyd in God se teenwoordigheid te wees, om in gemeenskap met God te woon. Gemeenskap beteken om met die Here te praat, heerlik met Hom te gesels, sy aangesig te soek en sy teenwoordigheid te ken.
Die Here se deursoekery van die hart, is nie wraaksugtig nie maar verlossend. Sy doel is nie om ons in sonde te betrap of ons te veroordeel nie, maar Hy wil ons voorberei om sy heilige teenwoordigheid te betree as skoon, rein werktuie.
