Volkome Afhanklik van Hom
God het die volkie Israel geneem en hulle in 'n woestyn afgesonder. Hy het hulle in 'n skool van beproewing geplaas om 'n volk te maak wat Hom sou vertrou, ongeag die omstandighede. Hy wou hê Israel moes getuig: “Ek kan deur enige beproewing gaan, enige moeilikheid, selfs dié bokant my vermoë. Hoe? Ek weet dat my God met my is in elke beproewing. Hy sal my altyd deurdra.”
Dink aan Moses se stelling aan Israel: “En Hy [God] het julle verootmoedig en jou laat honger ly... om aan jou bekend te maak dat die mense nie van brood alleen sal lewe nie, maar dat die mens lewe van alles wat uit die mond van die HERE kom” (Deuteronómium 8:3, AFR53).
Een van die ergste beproewings wat enige mens kan ondergaan, word in Job opgeteken. Hy het al sy kinders in 'n tragiese ongeluk verloor en toe verloor hy sy besittings. Uiteindelik het hy sy fisiese gesondheid verloor. Al hierdie dinge het in so 'n kort tyd gebeur dat dit heeltemal oorweldigend was.
God het Job op hierdie pad geplaas en die Here alleen het geweet waarheen dit uiteindelik sou lei. Dit was 'n plan wat so goddelik georkestreer was dat God selfs toegelaat het dat Satan Job teister. Dit is hoekom Job God in niks daarvan kon sien nie. “Kyk, ek gaan na die ooste, en Hy is nie daar nie; en na die weste, maar ek bemerk Hom nie. As hy in die noorde werk, aanskou ek Hom nie; buig Hy af na die suide, dan sien Ek Hom nie. Want Hy weet hoe my wandel is; as Hy my toets, sal ek soos goud te voorskyn kom” (Job 23:8–10). Dit is 'n fenomenale stelling, veral met inagneming van die konteks waarin Job dit gesê het.
Job het gesê: “God weet wat ek alles ly. Hy ken die pad deur dit alles heen. My Here beproef my nou. Ek is vol vertroue dat Hy my sal deurdra met 'n sterker geloof. Ek sal uitkom met ’n geloof wat kosbaarder is as goud.”
God wou nog altyd 'n volk hê wat volkome op hom aangewese sou wees voor die oë van die wêreld. Die Here sê vir ons, “Ek het jou beproewing georkestreer. Ek wag vir jou om aan die einde van al jou selfstandigheid te kom. Ek laat jou toe om ’n plek van menslike hulpeloosheid te ervaar en dit sal ’n wonderwerk van verlossing van My af verg.” Vandag soek die Here steeds na mense wat volkome op Hom sal staatmaak. Hy wil hê dat 'n ongeredde wêreld sien dat Hy kragtig optree vir diegene wat Hom liefhet.
