Wanneer Ons God se Krag Beperk
Die Skrif sê van Israel: “En hulle het God opnuut versoek en die Heilige van Israel gekrenk. Hulle het nie aan sy hand gedink, aan die dag toe Hy hulle van die teëstander verlos het nie” (Psalm 78:41-42, AFR53). Israel het in ongeloof van God af weggedraai. Net so glo ek ons krenk of beperk God vandag met ons twyfel en ongeloof.
Ek beperk God die meeste op die gebied van genesing. Ek het al vir baie mense gebid vir fisieke genesing, en ek het gesien hoe God wonderwerk na wonderwerk verrig. As dit by my eie liggaam kom, beperk ek God egter. Ek is bang om Hom God vir my te laat wees. Ek behandel myself met medisyne of hardloop na 'n dokter toe voordat ek ooit vir myself bid. Ek sê nie dit is verkeerd om dokter toe te gaan nie, maar soms pas ek by die beskrywing van diegene wat “selfs in sy siekte het hy die HERE nie geraadpleeg nie, maar die geneeshere” (2 Kronieke 16:12).
Jesus sê dat God nie ons gebede en lofprysinge hoor bloot omdat ons dit vir ure op 'n slag oor en oor uitspreek nie. Dit is moontlik om te bid, te vas en regverdige dinge te doen en steeds nie die plek te bereik waar ons daarna smag om Hom te ken en sy weë te begin verstaan nie. Dit is gedemonstreer tydens Christus se bediening teenoor die einste mense wat saam met Hom grootgeword het.
“En Hy het in sy vaderstad gekom en hulle geleer in hul sinagoge, sodat hulle verslae was en gesê het: Waar kry Hy hierdie wysheid en kragte vandaan? Is Hy nie die seun van die timmerman nie? Is die naam van sy moeder nie Maria ... nie?... En hulle het aanstoot aan Hom geneem.
“Maar Jesus sê vir hulle: 'n Profeet is nie ongeëerd nie, behalwe in sy vaderland en in sy huis. En Hy het daar vanweë hulle ongeloof nie baie kragtige dade gedoen nie” (Matthéüs 13:54-58).
Ons leer nie sy weë ken in die binnekamer van gebed alleen nie, alhoewel elkeen wat die Here werklik ken, baie intiem met Hom is. Sonder kwaliteit tyd waartydens ons God vir ons God laat wees, elke behoefte en versoek in sy hande neerlê en dan vorentoe stap in die geloof dat Hy sal antwoord, kan ons God se weë nie leer ken nie.
