God Kan Jou Red
Die apostel Petrus sê vir ons: “Want as God...die ou wêreld...nie gespaar het nie, maar Noag...toe Hy die sondvloed oor die wêreld van goddelose mense gebring het; en deur die stede van Sodom en Gomorra tot as te verbrand...as ‘n voorbeeld gestel het vir die wat in die toekoms goddeloos sou wees; en die regverdige Lot gered het...want...die Here weet om die godsaliges uit versoeking te verlos” (2 Petrus 2:4-9).
Ondanks die hardheid van hierdie voorbeelde, stuur God sy volk ‘n duidelike boodskap van vertroosting, asof Hy wil sê: “Ek het pas twee van die grootste voorbeelde van my medelye gegee. As Ek te midde van 'n wêreldoorstromende vloed een regverdige man en sy gesin uit die verwoesting kan verlos ... kan Ek jou dan nie ook verlos nie? Kan Ek nie ‘n bonatuurlike uitkoms bied nie?”
Die les hier vir die regverdiges is die volgende: God sal alles doen wat nodig is om sy kinders te red uit vurige beproewings en versoekings. Dink daaraan: Dit het die opening van die Rooi See geverg om Israel uit die kloue van sy vyand te verlos. Dit het geverg dat water uit ‘n rots kom om dieselfde Israeliete van hul woestynbeproewing te red. Dit het wonderbrood, engele se kos wat letterlik uit die hemel gestuur is, geverg om hulle van honger te red. En dit was nodig vir ‘n ark om Noag van die sondvloed te red en engele moes Lot begelei uit verwoesting van vuur. Dit is duidelik dat God weet hoe om sy kinders te verlos, en dat Hy tot die uiterste gaan om dit te doen, ongeag hul omstandighede.
Petrus se uitdrukking “God weet hoe om te verlos” beteken eenvoudig: “Hy het reeds planne beraam.” Die wonderlike waarheid is dat God reeds planne het vir ons bevryding, nog voordat ons tot Hom roep. En Hy vertraag nie daardie planne nie; Hy wag net op ons hulpgeroep. Ons kan verstrengel raak in die stryd van ‘n leeftyd en wonder hoe God ons sal verlos, maar tog is Hy altyd gereed om sy plan in werking te stel.
Ons sien dit geïllustreer in Jeremia 29, toe Israel in ballingskap na Babel gegaan het. Hier was miskien die grootste beproewing wat God se volk nog ooit beleef het, maar tog het die Here hulle belowe: “Na sewentig jaar sal Ek julle besoek en my Woord aan julle nakom.”
“Want Ék weet watter gedagtes Ek aangaande julle koester, spreek die HERE, gedagtes van vrede en nie van onheil nie, om julle ‘n hoopvolle toekoms te gee” (Jeremia 29:11). Die laaste frase beteken letterlik “om jou te gee waarna jy smag.” God wil hê dat ons moet aanhou bid sodat ons gereed sal wees vir sy verlossing.